၂၃။ ။ မေး။ ။အတိတ်တရား အနာဂတ်တရားတွေကို ရှုမှတ်လို့ အမှန်အတိုင်းသိနိုင်ပါသလား။

ဖြေ။ ။ ၀ိပဿနာရှုမှတ်ရာမှာ သာဝကများအတွက်ဆိုရင် မိမိသန္တာန်က တရားသာလိုရင်း ဖြစ်ကြောင်း အခြားတရားတွေကတော့ အနုမာနအားဖြင့် နှိုင်းဆပြီး ဆင်ခြင်ဆုံးဖြတ်ရုံမျှသာ လိုကြောင်းများကို ဥပရိပဏ္ဏာသ ပါဠိ အနုပဒ သုတ်၏ အဖွင့် အဋ္ဌကထာ ဋီကာများမှာ အတိအကျ ပြဆိုထားပါတယ်။ ဒါကြောင့် မိမိသန္တာန်က ရုပ်နာမ်တရားတွေကိုသာ ကိုယ်ပိုင်ဥာဏ်ဖြင့် အမှန်အတိုင်း သိအောင် ရှုဖို့ လိုပါတယ်။

မိမိသန္တာန်က တရားတွေထဲမှာလည်း အနာဂတ်တရားတွေဆိုတာ ယခုမဖြစ်သေး မရှိသေးတဲ့ အတွက် သူတို့ကို မှန်းဆပြီး ရှုလို့ အမှန်အတိုင်း မသိနိုင်ဘူး။ အတိတ်တရားတွေထဲမှာလည်း ရှေးဘ၀များက တရားတွေကိုတော့ မှန်းဆပြီး ရှုလို့ အမှန်အတိုင်း မသိနိုင်ကြောင်း ထင်ရှားပါတယ်။ ယခုဘ၀အတွင်းမှာတောင်မှ လွန်ခဲ့ပြီးနှစ်ပိုင်း လပိုင်းရက်ပိုင်းများက တရားတွေကိ အမှန်အတိုင်း သိဖို့ မလွယ်ပါဘူး။ နာရီပိုင်းအတွင်းလောက်က တရားတွေကိုတောင်မှ ပရမတ် သဘောတရားအနေဖြင့် အမှန်အတိုင်း သိအောင်ရှုဖို့ ခက်ပါတယ်။ ဘာကြောင့်လဲ ဆိုတော့ ပကတိလူတွေမှာ မြင်ပြီး၊ ကြားပြီး၊ တွေ့သိပြီး တာနဲ့ တစ်ပြိုင်နက် ငါပဲ သူပဲ မိန်းမပဲ ယောကျာ်းပဲ အစရှိတဲ့ ပညတ်အနေအားဖြင့် စွဲလန်းပြီး ဖြစ်နေသောကြောင့်ပါပဲ။

ဒါကြောင့် ဘဒ္ဒေကရတ္တသုတ်မှာ (ပစ္စုပ္ပန္နဉ္စ ယံဓမ္မံ တတ္ထ တတ္ထ ၀ိပဿတိ) ဖြစ်ဆဲ ပစ္စုပ္ပန်တရားကို ထိုသို့ ဖြစ်ခိုက်၌ ၀ိပဿနာရှုသည်လို့ ပြဆိုထားတဲ့အတိုင်း မြင်ဆဲ ကြားဆဲ စသော ပစ္စုပ္ပန်တရားကို စပြီး ရှုရပါတယ်။ နောက်ပြီးတော့ သတိပဋ္ဌာန် ပါဠိတော်မှာလည်း (ဂစ္ဆန္တော ၀ါ ဂစ္ဆာမီတိ ပဇာနာတိ) စသည်ဖြင့် သွားဆဲ ရပ်ဆဲ ထိုင်ဆဲ လျောင်းဆဲ စသော ပစ္စုပ္ပန်တရားကို ရှုသိရန် ပြဆိုထားတဲ့ အတိုင်း ဖြစ်ဆဲ ပစ္စုပ္ပန်တရားကို စပြီး ရှုရပါတယ်။

ယခုလို နက်နက်နဲနဲထုတ်ဖော်ပြရတာကတော့ ဒီအနတ္တလက္ခဏသုတ်ပါဠိမှာ အတိတ်ကစပြီး ဟောထားတဲ့ အတွက် အတိတ်တရားတွေက စပြီးတော့ တွေးတောဆင်ခြင်ပြီး ရှုရမှာလေလားလို့ သံသယ မဖြစ်ရအောင်လို့ပါပဲ။ (အနတ္တလက္ခဏသုတ်တရားတော်)


၂၄။ မေး။ ။ ရုပ် အနိစ္စ၊ ရုပ် အနိစ္စ လို့ဆိုပြီး ရှုမှတ်နေရင် ဘာနဲ့ တူနေပါသလဲ။

ဖြေ။ ။ ရုပ် အနိစ္စ ရုပ်အနိစ္စလို့ဆိုပြီး ရှုနေတယ် ဆိုပါတော့။ သူ့ဟာ ဝေါဟာရကတော့ အမှန်သားပဲ။ ရုပ်ဆိုတာလည်း ရူပံ ဆိုတဲ့ ပါဠိနဲ့ ညီတယ်။ အနိစ္စဆိုတာကလည်း အနိစ္စံဆိုတဲ့ ပါဠိနဲ့ ညီတယ်။ ဒါကြောင့် သူဟာ ဝေါဟာရကတော့ အမှန်သားပဲ။ ဒါပေမဲ့လို့ အဲဒီပုဂ္ဂိုလ်ကို သေသေချာချာ မေးကြည့်ပါ။ ရုပ်အနိစ္စလို့ ဆိုတာက ဘယ်ဟာကို အာရုံပြုပြီးတော့ နှလုံးသွင်းနေတာလဲ။ ဘယ်ရုပ်မမြဲတာကို သိနေတာလဲ လို့ မေးကြည့်ပါ။

ဘယ်ရုပ်မျှ မဟုတ်ပါဘူး။ ရုပ်အနိစ္စ ဆိုတဲ့ နာမည်လောက်ပဲ သိတယ်။ အဲဒီရုပ်ဟာ လွန်ခဲ့ပြီးသော ကာလက တွေ့ခဲ့ရတဲ့ အတိတ်ရုပ်လား၊ နောက်မှ ဖြစ်မယ့် အနာဂတ်ရုပ်လား လောလောဆယ် ဖြစ်ပေါ်နေတဲ့ ပစ္စုပ္ပန်ရုပ်လားလို့ မေးကြည့်ပါ။ ဘာမှမဟုတ်ဘူး။ ကိုယ့်သန္တန်က ရုပ်လား၊ သူများသန္တန်က ရုပ်လားလို့ မေးကြည့်ပါ။ ဘယ်က ရုပ်မှ မဟုတ်ဘူး။ ကိုယ့်သန္တန်က ရုပ်ပါ လို့ ဆိုရင် ခေါင်းထဲကရုပ်လား၊ ကိုယ်ထဲက ရုပ်လား၊ လက်ထဲက ရုပ်လား၊ အရေခွံရဲ့ အပေါ်ယုံက ရုပ်လား၊ ဒါမှမဟုတ်ရင် အတွင်းက အသားထဲ၊ အူထဲ၊ အသည်းထဲက ရုပ်လား၊ ဘယ်က ရုပ်လဲ မေးကြည့်ပါ။ ဘယ်က ရုပ်မှမဟုတ်ဘူး။

ရုပ်ဆိုတဲ့ အမည်နဲ့ အနိစ္စဆိုတဲ့ အမည်ကို သူစဉ်းစားနေတာပဲ။ ဒါတွေကို စိတ်ထဲကနေပြီး ခေါက်တုံ့ခေါက်ပြန် နှလုံးသွင်းနေတာပါပဲ။ စာပြန်နေတာနဲ့ တူပါတယ်။ ဒါလောက်ပါပဲ။ (၀မ္မိကသုတ်တရားတော်)

စာရေးသူ-အရှင်သာမဏေကျော်