၂၈။ မေး။ ။ သတိပဋ္ဌာန် ပါဠိတော်မှာ ၀င်လေ ထွက်လေရဲ့ အစအလယ် အဆုံး သုံးပါးလုံးကို ထင်ရှားအောင် မှတ်ရမယ်လို့ ဟောထားပါတယ်။ ပဋိသမ္ဘိဒါမဂ်ပါဠိ ဥပက္ကိလေသဥာနနိဒ္ဒေသမှာ ၀င်လေထွက်လေရဲ့ အစအလယ်အဆုံးတို့ကို သတိနဲ့လိုက်ပြီး ရှုမှတ်နေသူမှာ သမာဓိပျက်ကြောင်း ဖြစ်တယ်လို့ ဟောထားပြန်ပါတယ်။ အဲဒီပါဠိတော်နှစ်ခုရဲ့ အဓိပ္ပါယ်ဟာ သမထ ၀ိပဿနာတို့နဲ့ ခြားနားပါသလား။

ဖြေ။ ။ "သဗ္ဗကာယပဋိသံဝေဒီ စသော ပါဠိတော်နှင့် သကလဿ အဿသကာယဿ ပဿသကာယဿ အာဒိမဇ္ဈပရိယောသာနံ ၀ိဒိတံ ကရောန္တော" စသော အဋ္ဌကထာအရအားဖြင့် အစအလယ်အဆုံး သိအောင် ရှုပုံမှာ ၀ိသုဒ္ဓိမဂ် ပထမ နှာ (၂၇၂) ၌ "အပိစ ခေါ ဖုသနာဝသေနစ ဌပနာဝသေနာ စ မနသိ ကာတဗ္ဗံ" ဟု ပြထားသည့်အတိုင်း နှာသီးဝ တိုက်ရိုက်ထိရာ၌သာ ၀င်လေထွက်လေ၏ အစ အဆုံးကို သိအောင် ရှုခြင်းမျှသာ ဖြစ်ပါသည်။ ထိုသို့ တစ်နေရာတည်း၌ ရှုနေမှသာ သမထ သမာဓိက ဖြစ်နိုင်ပါသည်။

ထို့ကြောင့် သမထသမာဓိ ဖြစ်အောင် ရှုသူမှာ နှာသီးဝဌာနမှ အတွင်းဘက်သို့ လိုက်၍မရှုသင့်ကြောင်း၊ ထိုသို့ ရှုပါက အတွင်း၌ ပြန့်လွင့်ခြင်း၊ အပြင်၌ ပြန့်လွင့်ခြင်းများ ဖြစ်ကြောင်းကို ပဋိသမ္ဘိဒါမဂ်ပါဠိ၌ "အဿာသာဒိမဇ္ဈပရိယောသာနံ သတိယာ အနုဂစ္ဆတော" စသည်ဖြင့် ပြထားပါသည်။ ထိုစကားရပ်ဖြင့် သမထ သမာဓိ ဖြစ်အောင် ရှုပုံကိုသာ ပြခြင်း ဖြစ်ပါသည်။ ၀ိပဿနာဥာဏ်ဖြစ်အောင် ရှုရာ၌မူကား သဗ္ဗံအဘိညေယျံ စသည်ဖြင့် မည်သည့်ဌာနက ရုပ်မဆို ထင်ရှားပေါ်လာသမျှကို ရှုသိအပ်ကြောင်း ဟောပြထားပါသည်။ (ဆိပ်ခွန်ရွာ ဥုးသုန္ဒရ မေး၍ မဟာစည်ဆရာတော်၏ ဖြေကြားချက်)


၂၉။ ။ မေး။ ။ ဖောင်းတယ် ပိန်တယ်၊ ကွေးတယ်၊ ဆန့်တယ် စသည်ဖြင့် မှတ်နေတာဟာ ပရမတ်သဘော မဟုတ်ဘဲ ပညတ်ပဲ ထင်တယ် မဟုတ်ပါလား။

ဖြေ။ ။ ၀ိပဿနာကို ကောင်းကေင်း အားမထုတ်ဖူးတဲ့ အချို့ပုဂ္ဂိုလ်တွေက ကွေးတယ် ဆန့်တယ်လို့ မှတ်ရင် လက်ခြေပုံသဏ္ဍာန် ပညတ်တွေ ထင်နေမှာပေါ့။ ညာလှမ်းတယ်၊ ဘယ်လှမ်းတယ်လို့ မှတ်ရင် ခြေကားရား သဏ္ဍာန်ပညတ် ထင်နေမှာပေါ့။ ဖောင်းတယ် ပိန်တယ်လို့ မှတ်ရင် ဗိုက်ပုံသဏ္ဍာန် ပညတ်ကြီး ထင်နေမှာပေါ့ လို့ သူတို့ရဲ့ ထင်မြင်ချက်ကို ပြောကြတယ်။ အဲဒီလို ပြောတာဟာ ရှုခါစ ပုဂ္ဂိုလ်အတွက်တော့ မှန်သင့်သလောက် မှန်မှာပါပဲ။

ဒါပေမဲ့ သူတို့ ထင်တဲ့အတိုင်း ပညတ်ချည်း ထင်နေမယ်ဆိုတာကတော့ မမှန်ပါဘူး။ ရှုခါစမှာ ပညတ်လည်း ထင်ပါတယ်။ ပရမတ် လှုပ်ရှားမှုလည်း ထင်ပါတယ်။ တချို့ကလည်း ပရမတ်လှုပ်ရှားမှု သဘောကိုသာ ရှုရမယ်လို့ ညွှန်ပြကြတယ်။ အဲဒါကလည်း အားထုတ်ခါစ ပုဂ္ဂိုလ်အတွက် မဖြစ်နိုင်တဲ့ အလုပ်ပါပဲ။ အားထုတ်ခါစမှာ ပညတ်ကို လုံးလုံး မေ့ပျောက်ထားဖို့ ဆိုတာဟာ လက်တွေ့မှာတော့ မဖြစ်နိုင်တဲ့ အလုပ်ပါပဲ။

ဖြစ်နိုင်တာကတော့ လောကဝေါဟာရအတိုင်း ပညတ်နဲ့ တွဲပြီး ရှုမှပဲ ဖြစ်နိုင်ပါတယ်။ ဒါကြောင့် မြတ်စွာဘုရားကိုက ဂစ္ဆာမီတိ ပဇာနာတိ၊ သွားသည်ဟု သိ၏။ သမိဉ္စိတေ၊ ကွေးသည်ရှိသော်။ ပသာရိတေ၊ ဆန့်သည်ရှိသော ဤသို့စသည်ဖြင့် ပညတ်ဝေါဟာရနဲ့ပဲ ဟောထားပါတယ်။

ဝိတ္ထဘတီတိ ပဇာနာတိ၊ တောင့်တင်းသည်ဟု သိ၏။ သမုဒီရတီတိ ပဇာနာတိ၊ ရွေ့လျားသည်ဟု သိ၏ ဤသို့ စသည့် ပရမတ် ဝေါဟာရသက်သက်နဲ့ မဟောခဲ့ပါဘူး။ အမှန်မှာတော့ မြတ်စွာဘုရား ဟောတဲ့အတိုင်း သွားတယ်၊ ကွေးတယ်၊ ဆန့်တယ် စသည်ဖြင့် ပညတ်ဝေါဟာရနဲ့ ရှုနေပေမဲ့လို့ သတိသမာဓိက ရင့်ကျက်လာတဲ့အခါမှာ ပုံသဏ္ဍာန် ပညတ်တွေ အကုန်ပျောက်ပြီးတော့ တောင့်တင်းလှုပ်ရှားတဲ့ သဘာဝသက်သက်သာ ထင်ပါတယ်။ (၀ိပဿနာအခြေခံတရားတော်)